स्मशान शांतता

ओठांवरती जे शब्द येतात
जे तिथेच मूक गिळून बसतात
ज्या शब्दांना भावनांची अनुभूती
दाखवत येत नाही, ती
स्मशान शांतता.

काही शब्द एवढेही थोर नसतात
काही शब्द एवढेही शूर नसतात
अश्या शब्दांची जी थडगी
मनात बनतात, ती
स्मशान शांतता.

माणसांचे ढीग च्या ढीग समोर आहेत
काही प्रिय आहेत काही अप्रिय आहेत
तरीपण माझ्या शब्दांच्या मनात घुसमट आहे
प्रत्येक नात्याला कोणत्यातरी शब्दाची
भीती आहे, ती भीती,
स्मशान शांतता

चविष्ट शब्दांनी, माणसाच्या
कानाचे चोचले पुरवणाऱ्या
निस्वार्थ शब्दांच्या स्वार्थी भावनेने
जी उत्पन्न होते, ती
स्मशान शांतता

अस्तित्व आणि खरंखुर अस्तित्व
शब्द आणि व्यक्तिप्रमाणिक शब्द
भावना आणि निस्वार्थ भावना
ह्याच्यामध्ये जी पोकळी आहे, ती
स्मशान शांतता

-नियाज मुलाणी